١٠ شكاوي ما ينفعش ننساهم من ٢٠١٥

أهم شكاوي عام ٢٠١٥

Follow us:

Facebooktwitter

كل سنة و انتم طيبين و سنة جديدة سعيدة على الكل. بعد ما خلصت سنة 2015 و دخلنا في سنة جديدة حبينا نستعرض معاكم اكتر شكاوي مش ممكن نفوتهم كده بسهولة. بنتمنى المشاكل دى متتكررش تانى و بنعيد نشرها عشان الناس تاخد بالها. من غيركلام كتير، تعالوا نستعرض الشكاوي ديه.

1- شكوى من عربية كيا ريو

نور اشتريت عربية كيا ريو و دي كانت غلطتها، بعد كام شهر الدركسيون فصل باور و الكلكس فصل ولما راحت التوكيل قالولها حلينا المشكلة. للاسف الموضوع رجع تاني و انتهى بحادثة كبيرة لنور و زيادة على المشاكل دى الاير باج مافتحتش و كمبيوتر العربية مسجلش الحادثة. و طبعا كان ده سبب كفاية ان رد الشركة يكون تقرير الحادثة بيقول انها مش حادثة قوية. احنا بنتمنى ان يكون في شوية اهتمام بحياة الناس في السنة الجديدة و هنسيبكم مع صورة للعربية بعد الحادثة.

10271554_781960545230511_3587367140536522486_n

2- تبديل نتائج تحاليل في معمل المختبر

هانى نبيل اب لبنت صغيرة حب يطمن عليها و لكن لسوء حظه راح يعملها تحاليل فى معمل المختبر في ميدان الحرية في المعادى. نتيجة التحاليل كانت ان بنته عندها مرض السكر في مرحلة متقدمة ولازم يطلع يجري على المستشفى لانها ممكن تدخل في غيبوبة سكر. طبعا الراجل طلع يجري على كذا مستشفى وبعد الكشف عليها في مستشفى الحكمة اكتشفوا ان معندهاش حاجة. هانى عمل تحاليل تاني في اماكن كتيرة للتأكد وكلهم اجمعوا ان بنته سليمة. و طبعا رجع كلم معمل المختبر و بعد شرح الحالة للدكتورة قالتله ببساطة كده ممكن يكون العينة اتبدلت بمريض تانىي الحمد لله ان بنته بخير بس كام واحد ممكن يموت و لا يحصله حاجة بسبب تبديل عينة تحليل!

شش

3- بلطجة مطعم “كيّف” على الناس

شكوى طبيعية جدا من شخص راح اتفرج على ماتش الاهلى والزمالك في مطعم كيّف في بورتو مارينا و الاكل معجبوش والخدمة كانت بطيئة وهي شكوى معتادة في المناسبات وايام الازدحام عموما. لكن بعد نشر الشكوى لقينا ناس كتير ظهرت بردود على صفحتنا ان الراجل ده كان بيعاكس البنات و بيشتم العاملين فى المكان و ان هو كداب و كلام واتهامات كتير من مجموعة من الاشخاص. بعد التأكد من الشكوى و متابعة الردود تبين ان الناس ألىي شتمت الراجل و اتهمته باتهامات شنيعة دول صاحب مطعم كيف في بورتو مارينا و شوية من اصحابه و شوية من العاملين في المطعم. و دى كانت سابقة، ان بدل ما تحاول تكسب زبون لا انت تشتمه.

1111

4- حفرة في شارع التسعين في التجمع.

ماشي بعربيتك في امان الله وعلى مهلك كده عشان الدنيا ليل ورابط حزامك و كله تمام؟  لا مش تمام خالص حضرتك، لأن مرة واحدة لاقيت نفسك وقعت في حفرة وطبعا احنا نقصد حفرة فعلا. عربية ماشية في الطريق البطئ لشارع التسعين وقعت في حفرة عمقها اتنين متر دمرت العربية وربنا ستر وصاحبة العربية خرجت سليمة. خلوا بالكم وانتم سايقين و توقعوا اى حاجة.

12313540_938753462884551_5329691973442611904_n

5- تسمم جماعي من ام على “TBS”

يمكن دي كانت من اكبر مشاكل الاكل الشهيرة في رمضان ألي فات. في يوم من ايام رمضان جالنا كمية شكاوي رهيبة من عملاء TBS ان ناس جالهم تسمم و تبين ان كلهم كانوا جابين ام على كانت بايظة في اليوم ده وتسببت في اصابة اكثر من 150 شخص بالتسمم. والموضوع وصل لاغلاق المصنع و المحلات الخاصة بTBS من وزارة الصحة. هو امر كان كارثي بكل المقاييس و لكن الشئ الايجابي الوحيد في الموضوع كان في تحمل المكان المسئولية واعتذارهم لعملائهم واصدار بيان توضيحي لاسباب الحادث وتحملهم لتكاليف الرعاية الصحية للمصابين على حد وصفهم.11

6- عصير تفاح بايظ جديد من عصير بيتي في الاسواق

جاتلنا اكتر من شكوى في شهر اغسطس الفات ضد شركة بيتى وتحديدا عصير التفاح. كل الناس لاحظت ان طعم العصير فاسد. بالرغم من ان ماكانش في تأثير واضح على حد يعني والحمدلله ماحصلش حالات تسمم، الا ان مجرد فكرة وجود عصير فاسد في الاسواق دي تخوف اي حد. بالرغم من ان الشكاوي تكررت على مدار الشهر ولكن شركة بيتي لم تستجيب الا بعد ما يقرب من شهر ونص وسحبت جميع العبوات من السوق.

11781647_899406810152550_7216825464621987229_n

7- منع المايوهات الشرعية فى “stella di mare” و “Solaris club” و “La Vista”

كان من الواضح في الصيف ألي فات ان في حرب على المايوهات الشرعية للدرجة ألي خلت جرايد و صحف زي اليوم السابع تتكلم عن الموضوع. و لكن اكتر تلات حالات وصلولنا كانوا في الاماكن المكتوبة فوق. كان الموضوع مستفز من اول منع المحجبات من الدخول اصلا لحد محاولة تبرير الموضوع بمبررات مضحكة زي ان المايوة الشرعى بينقل البكتيريا اكتر وطبعا كمان بمنع غير المحجبات لمجرد انهم لابسين مايوه بكوم طويل مثلاً. احنا طبعا مش فاهمين هما بيعملوا القوانين دي ليه بس الاكيد انها مش بتشجع السياحة مثلا ولا من باب الحريات و المساواة ولا من اي باب اصلا! نتمنى التهريج ده يقف في السنة الجديدة عشان مابقاش كوول خالص!

8- TEDATA تضرب من جديد

جالنا شكاوي كتير السنة دي ضد TEDATA … كتير اوي الصراحة. ومعظمهم كان بيشتكي من انقطاع الانترنت. فترات انقطاع الانترنت كانت بتتراوح من اسبوع لتلات اربع شهور. ايوه انت قريت صح، اربع شهور! بس في مرة جاتلنا شكوى كانت رقم قياسى جديد الصراحة و ممكن يكون الرقم الاكبر على مستوى العالم. الانترنت كان فاصل لمدة سنة كاملة! دول لو بيركبوا انترنت في الصحراء مكانوش هياخدوا سنة.

15816_811598872266678_4789862236939817167_n

9- مشاكل فى تعليمات السداد للكريدت كارد مع HSBC

تخيل انت قاعد في يوم طبيعى رايح شغلك او نايم في بيتك او خارج تتفسح و تجيلك مكالمة من البنك ان انت عليك 12000 جنيه لازم تسددهم. لما تسأل ليه يقولك دي فوايد على معاملات كريدت كارد لم تسدد في موعدها. فتكتشف ان انت رغم تبليغك البنك ان يتم سحب المعاملات في موعدها من حساب المرتب الا ان البنك خالف التعليمات دي او لغاها من غير ما يبلغك. طبعا ممكن واحد يروح فيها من مجرد سماع الخبر. و للعلم المشكلة دى حصلت مع اكتر من بنك فحاولوا تاخدوا بالكم و تتابعوا بصفة دورية حساباتكم. البنوك بتغلط كتير و فلوسك بيتخصم منها وانت مش واخد بالك او لا قدر الله ممكن تدخل فى مشكلة زي مشكلة سامح تاخد من وقتك و تفكيرك شهور و يا تتحل يا ماتتحلش!

10690315_808585405901358_4100236854138437457_n

10- بنزين مخلوط بمياه من بنزينة مصر

غالبا لما بتكون مسافر بتلاقى البنزين قرب يخلص و بتحاول تدور على اقرب بنزينة تحط منها بنزين. مش بييجى في دماغك ان البنزين ده ممكن يكون فيه مشكلة لان دى مش حاجة المفروض تحصل. مي كانت على طريق الساحل ومرت بالموقف ده ومالاقيتش غير بنزينة مصر عند منطقة الحمام و بعد ما حطت بنزين العربية عطلت على طريق السفر واكتشفت بعد ما وصلت لميكانيكي ان البنزين عبارة عن خليط مياه وبنزين! انعدام الضمير وصل لمرحلة غير مسبوقة الصراحة.

11

طبعا احنا كان عندنا منافسة كبيرة بسبب كمية الشكاوي الكتير ألي كانت ممكن تنضم للقائمة بتاعتنا ولكن احنا ماحبناش نكبر المقالة اكتر من كده. احنا بنشكر اي حد شارك بشكوته خلال 2015 سواء قدرنا نحلها او ماقدرناش ولكن مجرد مشاركة الشكوى بتزيد الوعي عند الناس وبتخليهم عارفين يتصرفوا لما يقعوا في نفس المشكلة ونتمنى مشاركة اكبر على موقعنا www.eshteki.com عشان نوصل لهدفنا “معا من اجل خدمة افضل”.

(Visited 889 times, 1 visits today)

Share :

Facebooktwittergoogle_plusredditpinterestlinkedinmail

Eshteki.com is the first complaints network in the middle east aiming to link angry consumers to service providers. We will be glad to hear from you at info@eshteki.com

Eshteki

Eshteki.com is the first complaints network in the middle east aiming to link angry consumers to service providers. We will be glad to hear from you at info@eshteki.com

2 Comments

  1. منذ عامان جاء لى فاتورة من شركة الهاتف بأن على أن أقوم بسداد فاتورة بمبلغ 13000 جنيها وعندما اتصلت بخدمة العملاء عرفت ان القيمة استهلاك انترنت

Leave a Reply

Your email address will not be published. Required fields are marked *