حادث كايروفيستيفال سيتي بين القطاع الخاص و القطاع الحكومي

cfc-logo

Follow us:

Facebooktwitter

زي ما كلنا عارفين ان في يوم الجمعة 27 نوفمبر ألي فات أعلنت شركات ومواقع كتير عن عروض وتخفيضات كبيرة بمناسبة “بلاك فريداي” زي ما بيحصل في أمريكا. وفي وسط زحمة المشهد ما بين ناس كتير رايحة تشتري وحملات تسويقية على إطار واسع وبمبالغ ضخمة حصلت مأساة كبيرة ان احد العاملين في المول توفاه الله و هو بيعدي الطريق الدائرى لان مفيش كوبري مشاة أو اي طريق آمن للوصول من أي ناحية للناحية التانية على الدائري.

وبعد الحادث المأساوي ده الناس ماسكتتش وابتدت حملة على السوشيال ميديا بهاش تاج ‫#‏اقفلوا_كايرو_فيستيفال بتتهم ادارة كايروفيستيفال بالتخاذل في أن هي تبني كوبري مشاة بالرغم من الملايين ألى بتتصرف كل يوم من اعلانات وعروض وغيره. و لأن الحملة كانت كبيرة شوية وناس كتير شاركت فيها، أعلنت ادارة كايروفيستيفال سيتي تخصيصها لمبلغ 15 مليون جنية لانشاء كوبري مشاة على حد وصفهم انه “على احدث طراز وبسلالم متحركة ومواصفات عالمية لتسهيل عبور الطريق الدائري على الموظفين والزوار” و بيقولوا كمان انه تم الانتهاء من دراسة المشروع وانهم شغالين على تحضير الرسومات الهندسية.

cfc

احنا حابين في موقع اشتكى اننا نتكلم عن الموضوع بنظرة مختلفة وحابين نحط كام سؤال كده يمكن نوصل لاجابات. اولاً هل دي أول حادثة تحصل وهل ده أول شخص يموت او يتصاب او تحصله عاهة مستديمة ولا لأن الموضوع ماعداش زي كل مرة و تم نشره على السوشيال ميديا فبدأت الشركة تستجيب من باب ان هي تحافظ على شكلها؟ و لو دي مش اول حادثة ليه مايبقاش تقديم الحلول و الخدمات نابع من الرغبة في مساعدة الناس والحفاظ على ارواحهم مش كرد فعل على غضب الناس مع ان في الاساس المكان ده معمول عشان راحة ورفاهية الناس مش عشان توصل لان ناس بتموت في طريقها للمكان.

تاني سؤال بيمثل اهمية كبيرة هنا هو ده دور مين اصلا؟ هل ده دور كايروفيستيفال سيتي او القطاع الخاص بشكل عام ولا ده دور الحكومة؟ وهل حصل تنسيق اصلاً بين الحكومة وادارة المكان قبل الحادث للتأكد من معايير السلامة والامان؟ وزي ما شوفنا رد فعل من ادارة المكان زي ما شوفنا ان مفيش اي رد فعل حكومي للاسف ومفيش اهتمام بسلامة وحياة الناس. و نتمنى من إدارة كايروفيستيفال سيتى توضحلنا بشكل اكبر النقطة دي لان في الاخر المسئول على امن و سلامة الطرق هي الحكومة مش القطاع الخاص.

الموضوع الاهم دلوقتى، طيب لتفادى المشكلة دي مستقبلًا ادارة كايروفيستيفال سيتي قررت تبني كوبري مشاة . طيب هل دي بادرة طيبة من المكان وخلاص انما باقي الاماكن على الدائري والطرق السريعة هنفضل نشوف فيها نفس الحوادث؟ يعني لو كملنا على الدائرى هنلاقى اماكن زي بورتو كايرو وفندق كيمبنسكي مثلاً، ولو مسكنا طرق تانية هنلاقى اماكن كتير وارد تكرار نفس الحادثة تاني للعاملين هناك. فهل نشوف اجراء استباقي قبل ما تحصل حادثة تانية من ادارات الاماكن المشابهة؟

في الاخر بندعي ربنا يرحم كل من مات بسبب الإهمال وربنا يحفظنا جميعا من مشاكل و حوادث الطرق وبنتمنى كل الناس فى القطاع الخاص والحكومي يبقى عندها الحرص على حياة الناس و صحتهم قبل حرصهم على المكاسب المادية. وطبعاً يكون عندنا اجرائات وقوانين تضمن ده مش مجرد مجهودات فردية مبتحلش اصل المشكلة وطبعاً مهم في الآخر إننا نوصل لاجابات للاسئلة المطروحة.

لو شايف الكلام ده مهم، من فضلك شير المقالة ديه ووصل صوتنا!

(Visited 204 times, 1 visits today)

Share :

Facebooktwittergoogle_plusredditpinterestlinkedinmail

Eshteki.com is the first complaints network in the middle east aiming to link angry consumers to service providers. We will be glad to hear from you at info@eshteki.com

Eshteki

Eshteki.com is the first complaints network in the middle east aiming to link angry consumers to service providers. We will be glad to hear from you at info@eshteki.com

Leave a Reply

Your email address will not be published. Required fields are marked *